點解叫Money Freedom?
財務自由的英文應該是Financial Freedom或者Financial Independence，但因為兩個的域名都已被人使用，所以最後決定用比較接近的意思Money Freedom去註冊這個網站Domain。一個域名對網站好重要，不但是網友對這個新地方的觀感，例如個網址叫leeupmud9.com，相信你見到都無乜興趣得啖笑。網名亦最好易記，如果叫bonsomiyambongo.com，相信你一定記唔到，其實它是Financial Freedom翻譯成林加拉語，但一般人無可能識。最後一點Domain Name對SEO（Search Engine Optimization）好重要，遲啲同大家再分享Digital Marketing的各種方法。
理想的生活
首先自己要定義何謂財務自由？好多時問朋友你理想生活係點? 佢會答想擁有一間位於半山的獨立屋、每年都可以同一家大細環遊世界、滑雪及探險、幾架法拉利、林保超跑、一架私人飛機、一條100尺長的遊艇等等。要達成以上目標是什麼呢？你嘅答案一定是金錢。但我想話你知大家無考慮到一個最關鍵的要點，就係快樂！就算你擁有以上所有東西，達到這些目標，你也未必開心，因為它可能會帶來其他你未想像過的問題。例如有架大型遊艇招待朋友當然威威啦，但要保養、定期檢查、保養及維修、揾一個合適的地方停迫或加入遊艇會等等。
財務自由定義
做任何事情我都會搞清楚自己想要什麼? 背後動機是什麼? 唔係人云亦云大家咁做你就照做。所以我會先為財務自由下定義。我給的定義好簡單，就是:『做我想做的事而不用擔心你的有乜錢交租、俾錢阿媽、同仔女交學費、俾家用老婆等等。亦即係話我每月現金流入多過我使錢總數就係財務自由。』
當然我每月或每星期流入的現金不可以時多時少，否則你上個月過上流生活，下個月就可能要食Mac記。
而我嘅現金流來源可以有好多種類，例如舊社會成日會用的方法，『富爸爸，窮爸爸』的作者Robert Kiyosaki推薦的買樓收租大家一定識做，唔使我多介紹。又或者自己出書，我講啲並唔係實體書，它們利潤太少，唔會製做太多現金流。我講嘅係電子書，遲啲同大家介紹。又或者做網上生意，現代人比以前阿爸阿媽年代幸福好多，有好多揾錢方法，真係坐係屋企都可以賺錢，就好似好多媽媽都因為生小朋友後無時間出外工作，但它們往往因為同某些公司、製造商熟識而做團購賺錢。又或者大家常見的不同社交平台KOL，都係一個可以為大家帶來可觀穩收入來源。
有什麼方法可以賺取穩定每月收入? 我又用乜方法達到財務自由? 當中有無伏，我係下幾篇Blog會同大家分享經驗。
財務自由三步曲
第一步：理想生活
細心想清楚你人生追求什麼？定立一個明確目標，唔係話一句我要一千萬，我要做富翁咁就算。越Detail越好， 同要寫出背後原因，舉例：
- 我要住XX區三房屋苑，鍾意呢到因為可以養狗，環境清淨，風水好，附近有優質中小學，校網一流，返工只須車程１５分鐘，屋苑車位充足，我開Tesla電動車，屋苑內有义電站非常方便。選三房唔係兩房因為三房一般間隔都好過兩房又實用，而且要三房先足夠，因為一個我兩公婆用，一個阿仔房，另一間係我書房加工作房，因為我成日都要炒美股要好夜先瞓，三房就唔會嘈到屋企人。
- 我要每年去４次旅行，３次日本，一次歐洲。因為我老婆好喜歡日本時裝同美食，仲有打咭名勝古蹟，而我就喜歡冬天去札幌、北海道滑雪。另外歐洲係我老婆做時裝，每年都一定要去一次，同埋唔小得買包包。
從上例你可以睇到係好詳細，有咗個目標就去到第二步。
第二步：計數
呢一步好重要，因為你要１年、５年定１０年才達到財務自由就睇呢條數。點計呢?就係要把上面列出每一項要幾錢， 用一個Excel表計算好，最好係做到每月幾錢咁，例如你想每年去旅行４次，每次洗費當平均4萬5千，咁即係18萬一年，即係要每月$15,000。咁你就可以列一個表如下:
租金 $20,000
雜費 $50,00
家用 $8,000
交通 $3,000
旅遊 $15,000
…..
開頭要做一個咁詳細表可能有難度，特別成日用信用咭，又使費好瑣碎，真係唔知自己每月洗幾多，只知每月清，同個個月都要交咭數。建議大家多利用使費App, Android, iPhone都有好多，可以選擇一個介面你喜歡又合用，每日使錢都紀錄下來，兩三個月就會知自己及一家人使費多少。
當你做好以上表格就可以去第三步，亦係最重要一步。
第三步：你嗜好是什麼？
呢一步好重要，因為係決定你用什麼方法去達到財務自由。你可以嘗試想想你工餘時候最鍾意做乜？你做乜係最享受最自在又最投入? 你只要想想什麼事情係你最有熱情去做，可以不停做，日日做呢?
當你揾到之後，可能一項或兩項，如果更多當然更好。但一個都已足夠。
我有朋友因為喜歡玩錶，因而想到做名錶相關產品而每月賺５、６萬港幣。亦有朋友喜歡砌模型，但自己係讀電子工程出身，因而想到把小型汽車模型改裝加入車頭燈，聲效等自娛，發展到幫網友改裝成為一門生意。
所以唔好睇少自己嗜好，可能係一個為你帶來財務自由的方法。
至於如何實行就留意我未來Blog為大家一一講解分享啦。